काठमाडौं । भोटेकोशी बाढीबाट प्रभावित परिवारलाई सेन्चुरी ग्रुप (दुगड स्पाइसेस)ले दीर्घकालीन सहयोग गर्ने घोषणा गरेको छ। ग्रुपले तत्काल १०० जनालाई रोजगारी दिने तथा अभिभावक गुमाएका र आर्थिक रूपमा असहाय बालबालिकाको विद्यालय तहको शिक्षाको जिम्मेवारी लिने जनाएको हो। यसअघि ग्रुपका अध्यक्ष तथा पूर्वमन्त्री मोती दुगड र उनको परिवारले प्रधानमन्त्री दैवी प्रकोप उद्धार कोषमा ५१ लाख रुपैयाँ नगद तथा ५० लाख रुपैयाँ बराबरको खाद्यान्न र राहत सामग्री गरी कुल १ करोड १ लाख रुपैयाँ सहयोग गरिसकेको छ।

अब बाढी प्रभावितलाई दीर्घकालीन राहत पुग्ने गरी ग्रुपअन्तर्गतका विभिन्न उद्योग तथा कार्यालयमा रोजगारी उपलब्ध गराइने दुगडले बताए। रोजगारीका लागि वास्तविक आवश्यकता भएका प्रभावितलाई प्राथमिकता दिइने उनको भनाइ छ।दुगडले प्रभावित क्षेत्रमा प्रत्यक्ष पुगेर स्थानीयसँग जानकारी लिएपछि रोजगारी र शिक्षासम्बन्धी कार्यक्रम कार्यान्वयन गरिने बताए।उनले बाढीबाट नेपाली परिवारले ठूलो क्षति व्यहोरेको भन्दै राज्यसँगै निजी क्षेत्र, उद्योगी–व्यवसायी र आम नागरिकले आ–आफ्नो क्षमताअनुसार सहयोग गर्नुपर्ने बताए।