काठमाडौं । नेपालको इन्टरनेट विकास यात्रामा महत्वपूर्ण योगदान पुर्‍याएका वर्ल्डलिंक कम्युनिकेशन संस्थापक तथा अध्यक्ष दिलीप अग्रवाल ‘इन्टरनेट इनेबलर्स नेसनल अवार्ड’का पहिलो (Inaugural) सम्मानित व्यक्तित्वमध्ये एक बनेका छन्। नेपालभर  इन्टरनेट सेवाको विस्तार, डिजिटल पहुँच अभिवृद्धि तथा लाखौं नागरिकलाई इन्टरनेटसँग जोड्ने अभियानमा अग्रवालले खेलेको नेतृत्वदायी भूमिकाको कदर गर्दै उनलाई उक्त राष्ट्रिय सम्मान प्रदान गरिएको हो।

उनको दूरदर्शी सोच र अग्रसरताले नेपालको इन्टरनेट पूर्वाधार विकासलाई नयाँ उचाइमा पुर्‍याएको मात्र होइन, देशभरका समुदायलाई डिजिटल रूपमा जोड्न पनि महत्वपूर्ण भूमिका खेलेको मानिन्छ । नेपालको डिजिटल रूपान्तरण यात्राका एक अग्रदूतका रूपमा अग्रवालले वर्षौंदेखि सूचना तथा सञ्चार प्रविधिको पहुँच विस्तारमा योगदान पुर्‍याउँदै आएका छन्। 

उनको नेतृत्वमा वर्ल्डलिंक कम्युनिकेशनले  देशका विभिन्न क्षेत्रसम्म उच्चगतिको इन्टरनेट सेवा विस्तार गर्दै डिजिटल नेपालको निर्माणमा उल्लेखनीय योगदान दिएको छ। नेपालको इन्टरनेट इतिहासमा दीर्घकालीन प्रभाव पार्ने योगदानको सम्मानस्वरूप प्रदान गरिएको यो अवार्डलाई अग्रवालको समर्पण, दूरदृष्टि र नेतृत्वको उच्च मूल्यांकनका रूपमा हेरिएको छ।