डब्लिन, आयरल्याण्ड। गैरआवासीय नेपाली संघ (एनआरएनए) राष्ट्रिय समन्वय परिषद् आयरल्याण्डको आतिथ्यमा डब्लिनमा सम्पन्न १७औँ एनआरएनए युरोप क्षेत्रीय सम्मेलन–२०२६ सफलतापूर्वक सम्पन्न भएको छ। सम्मेलनको व्यवस्थापन, समन्वय र आतिथ्यताका कारण एनआरएनए आयरल्याण्डले युरोपेली नेपाली समुदायमाझ आफ्नो संस्थागत क्षमता र सक्रियताको बलियो परिचय दिएको छ।

सम्मेलन सफल बनाउन एनआरएनए एनसीसी आयरल्याण्डका अध्यक्ष चेतराज ओलीको नेतृत्वमा स्थानीय कार्यसमिति, स्वयंसेवक, आयोजक समिति तथा विभिन्न क्षेत्रका सहयोगीहरूले महत्वपूर्ण भूमिका निर्वाह गरेका थिए। एनआरएनएको आधिकारिक सम्मेलन व्यवस्थापन विवरणमा समेत ओलीलाई सम्मेलनको सदस्यसचिवका रूपमा जिम्मेवारी दिइएको थियो।

डब्लिनमा आयोजित सम्मेलनमा युरोपसहित विभिन्न मुलुकबाट एनआरएनए नेतृत्व, नेपाली समुदायका प्रतिनिधि, उद्यमी, व्यवसायी, विज्ञ तथा पेशाकर्मीहरूको सहभागिता रहेको थियो। नेपाली डायस्पोराका सरोकार, लगानी, युवा तथा दोस्रो पुस्ताको सहभागिता, ज्ञान–सीप आदानप्रदान र नेपालसँगको सम्बन्धलगायत विषयमा सम्मेलन केन्द्रित रहेको थियो।

सम्मेलनको सफल आयोजनाप्रति खुशी व्यक्त गर्दै अध्यक्ष ओलीले ऐतिहासिक क्षेत्रीय सम्मेलन आयोजना गर्ने अवसर पाउनु गौरवको विषय भएको बताउँदै सम्मेलन सफल बनाउन प्रत्यक्ष तथा अप्रत्यक्ष रूपमा योगदान गर्ने सबैप्रति धन्यवाद व्यक्त गर्नुभएको थियो।

सम्मेलनको उद्घाटन सत्रमा रास्वपाका संसदीय दलका उपनेता तथा प्रतिनिधिसभा सदस्य गणेश पराजुली प्रमुख अतिथिका रूपमा सहभागी हुनुभएको थियो। उहाँले गैरआवासीय नेपालीका माग तथा सरोकारलाई सरकारले क्रमशः सम्बोधन गर्दै जाने प्रतिबद्धता व्यक्त गर्नुभएको थियो। कार्यक्रममा नेपालका लागि विभिन्न प्रतिनिधि, एनआरएनए नेतृत्व तथा अन्य क्षेत्रका व्यक्तित्वहरूको सहभागिता रहेको थियो।

एनआरएनए आयरल्याण्डले यसअघि नै १७औँ युरोप क्षेत्रीय सम्मेलनको आतिथ्य गर्ने जिम्मेवारी पाएको थियो। त्यसअनुसार लामो समयदेखि गरिएको तयारीलाई मूर्तरूप दिँदै डब्लिनमा सम्मेलन सम्पन्न गरिनु आयरल्याण्डस्थित नेपाली समुदायका लागि समेत महत्वपूर्ण उपलब्धिका रूपमा हेरिएको छ।

अध्यक्ष चेतराज ओलीको नेतृत्वमा भएको यो सफल आयोजनाले एनआरएनए आयरल्याण्डको संस्थागत क्षमता, नेपाली समुदायप्रतिको जिम्मेवारी र युरोपेली नेपाली समुदायबीच सहकार्य विस्तार गर्ने प्रतिबद्धतालाई थप बलियो बनाएको छ। सम्मेलनले नेपाल र नेपाली डायस्पोराबीचको सम्बन्धलाई अझ सुदृढ बनाउन नयाँ संवाद र सहकार्यका लागि समेत आधार तयार गरेको छ।