साउन २५ गते, काठमाडौं । अविरल वर्षासँगै सडक माथिबाट लेदोसहितको पहिरो खसेपछि बीपी राजमार्ग पूर्ण रूपमा अवरुद्ध भएको छ। जिल्ला प्रहरी कार्यालय काभ्रेपलाञ्चोकका सूचना अधिकारी प्रहरी नायब उपरीक्षक रविन विष्टका अनुसार सोमबार बिहान करिब ४ बजे बीपी राजमार्गअन्तर्गत रोशी गाउँपालिका–९ को पिन्थली र नार्के क्षेत्रमा लेदोसहितको पहिरो खसेको हो।

पहिरो खसेपछि राजमार्गमा यातायात पूर्ण रूपमा ठप्प भएको प्रहरीले जनाएको छ। पहिरोका कारण यात्रु तथा सवारीसाधन बीच बाटोमै रोकिएका छन्। राजमार्ग खुलाउन सडक डिभिजन भक्तपुरसँग समन्वय भइरहेको प्रहरी नायब उपरीक्षक विष्टले जानकारी दिनुभयो। पहिरो पन्छाउने काम सुरु गरी राजमार्गलाई यथाशीघ्र सञ्चालनमा ल्याउने पहल भइरहेको प्रहरीले जनाएको छ।लगातारको वर्षाका कारण बीपी राजमार्गका विभिन्न स्थानमा पहिरो तथा सडक अवरोधको जोखिम रहेकाले यात्रुहरूलाई आवश्यक सावधानी अपनाउन आग्रह गरिएको छ।