काठमाडौं । शासकीय उत्तरदायित्व, सुशासनको माग गर्दै सुरू भएको युवाहरूको आन्दोलनको उद्देश्य गलत थिएन। तर आन्दोलनको आवरणमा गलत नियत भएका समूह र व्यक्तिको घुसपैठले तोडफोड, लुटपाट र विध्वंसमा परिणत भयो। जसमा देशकै सबैभन्दा ठूलो करदाता र रोजगारदाता भएको चौधरी ग्रुपलाई पनि अपुरणिय क्षती पुग्यो। 

देशैभर हिंसा, तोडफोड र लुटपाटका बीच चौधरी ग्रुप (सीजी) का प्रबन्ध निर्देशक निर्वाण चौधरीले आफ्ना कर्मचारी र सम्पूर्ण सीजी परिवारलाई भावुक सन्देश पठाएका छन्। हालैको अराजक घटनामा चौधरी ग्रुपका अध्यक्ष लक्षित हुनुका साथै पारिवारिक घर, उद्योग, कार्यालय र शोरूमहरूमा आगजनी तथा तोडफोड भएपछि उनले यो सन्देश जारी गरेका हुन्।

चौधरीले भनेका छन्, “दशकौँको श्रम, बलिदान र प्रतिबद्धता केही घण्टामै खरानी बनाइयो। यो केवल सम्पत्तिमाथिको आक्रमण मात्र होइन, हाम्रो आशा, विश्वास र राष्ट्रका लागि केही सार्थक बनाउने विचारमाथिको आक्रमण हो।”तर, उनले यो कठिन घडीमा पनि कर्मचारीहरूको साहस र समर्पणलाई खुलेर प्रशंसा गरेका छन्। “आगो सल्किँदा पनि हाम्रा मान्छेहरू हार मानेनन्। तपाईंहरूकै कारण आशा अझै जीवित छ,” उनले भनेका छन्।

सन्देशमा चौधरीले आफूहरूको मनोबल घाइते र हल्लिएको भए पनि भाँचिन नसक्ने दृढता प्रकट गरेका छन्। “हाम्रो भवनमा आगो लगाउन सक्छन् तर हाम्रो सपना जलाउन सक्दैनन्। हाम्रा शो-रूमहरू लुट्न सक्छन्, तर हाम्रो मूल्यहरू लुट्न सक्दैनन्” उनले उल्लेख गरेका छन्। उनले विगतका भूकम्प, बाढी वा महामारी जस्ता हरेक संकटमा देश र जनताका लागी अग्रपंक्तिमा उभिएको कुरा उल्लेख गर्दै भनेका छन्। 

“हामी फेरि बनाउनेछौँ, फेरि उठ्नेछौँ, र अझ सशक्त भएर अघि बढ्नेछौँ।” नेपालकै सबैभन्दा ठूलो करदाता मध्ये एक र ठूलो रोजगारदाता समेत रहेको चौधरी ग्रुपमाथी जेन-जी समुहको प्रदर्शनका दिन घर, उद्योग तथा शोरुमहरुमा अराजक समुहद्वारा तोडफोड तथा आगजनी भएको थियो। जसबाट चौधरी ग्रुपको अर्बौंको क्षती भएको छ।

काठमाडौँको सतुंगलमा रहेको चौधरी समूहको सीजी डिजिटल पार्क र थापाथलीमा रहेको शोरुममा जेनजी आन्दोलनका क्रममा तोडफोड गरी आगजनी गरिएको थियो । आगजनीपछी चौधरीले  युवाहरूको जायज मागलाई केही बाह्य शक्ति र अराजक तत्वहरूले अपहरण गरी कम्पनीको अर्बौंको सम्पत्तिमा क्षति पुर्‍याएको बताएका हुन्। प्रदर्शनकारीले सतुंगलमा रहेको सीजी इलेक्ट्रोनिक्सको स्टोर र थापाथलीमा रहेको सीजी मोटर्सको शोरुम पूर्ण रूपमा ध्वस्त पारेका छन् भने अहिले घटनापछि दुवै शोरुम भग्नावशेषमा परिणत भएका छन्।